Gaztelubidek, bazkide talde baten ekimenez, erabaki zuen bere danborrada tradizionalera Haur Konpainia bat gehitzea. Gaztelubideko Danborrada Txikiaren "debuta" 2011ko urtarrilaren 19an izan zen; 18:00etan irten eta 20:30ean amaitu zuten.
Haien ibilbidea helduen danborradak egiten duenaren antzekoa izatea nahi izan da. Hala, horrela geratu da ezarrita: Koruko Ama, Kanpandegi, Ijentea, Boulevard, Sarriegi plaza, Konstituzio plaza, San Jeronimo, Abuztuaren 31, Santa Maria, Kale Nagusia, Fermin Calbeton, Kanpandegi, Koruko Ama. Santa Mariako geraldiari aipamen berezi bat egin behar zaio, bertan jotzen baita San Sebastian martxa, Basilikaren barruan, eta horregatik da une oso hunkigarria haurrentzat zein helduentzat, haur danborradaren ibilbidean jarraitzen dietenentzat. Laguntzen digun bandak ere aipamen berezi bat merezi du: Udal Musika Eskolako Haur Banda da, eta kide guztiak dira 7 eta 14 urte bitarteko adinekoak.
