Aizepe Tanborrada

Aizepe elkartea 1924. urtean sortu zen Parte Zaharrean, auzoan pare bat danborrada “antolatu” besterik ez zegoenean, Antiguan beste bat eta Grosen bestea. Sokamuturra zen jaiaren erabateko protagonista. Aizepen, beste hainbat elkartetan bezala, bazkideek afaria egiten zuten bezperan eta afalondoan danborrada “espontaneoa” egiten zuten tapak, latak, kazolak eta abar erabilita. 90eko hamarkadan danborradak ugaritzearekin bat, elkartean kuadrilla gazteak sartu zirenean, bazkideak eta lagunak danborrada bat sortzeaz hitz egiten hasi ziren. Bazkide beterano batzuei arraro egiten zitzaien elkarte bakoitzak danborrada uniformeduna edukitzea. 2002. urtean Alejandro Txurruka, Antxon Larzabal, Borja Arrue, Etor Bolibar eta Iban Eguzkitzak batzordea sortu zuten eta danborrada atera zuten 2003. urtean. Geroztik beste askok parte hartu dute batzordean. Bihoakie gure eskerrona “Aizepe tanborrada” ahalbidetu zuten guztiei (Donostiako berezko euskaran: “Aizepe” hatxerik gabe eta “tanborra”, ez “danborra”).