Gure historia luzean zehar oker irtendako saialdiren baten edo besteren ondoren, eta bazkide talde batek bultzatuta, Istingorrako 2004ko Batzar Nagusiak onetsi egin zuen elkarteak bere danborrada izatea. Entseguen maratoi baten ondoren, 2005eko urtarrilaren 20an, denak sukaldari jantzita eta, jakina, estreinaldia zenez gero nerbioak dantzan genituela, gure danborrada atera zen argitara Javier Maresmarekin (Danbor Nagusia), Eneko Larequirekin (Danborren Kaboa) eta Martín Telleríarekin (Barrilen Kaboa).
Lehenengo urteko herstura gaindituta, eta Istingorraren 75. urteurrenarekin bat etorriz, elkarteak eta danborradako kideek ahalegin handiak egin zituzten, eta danborrek jantzi napoleoniko koloretsu eta deigarriak estreinatu zituzten.
Beste egun handi bat 2008ko urtarrilaren 20koa da, Elkartearen Batzar Nagusiaren akordioa betez emakumeak elkartu baitziren gure danborradara urketari gisa.
