Zuzendaritzako 3 kideri eta jokalarien guraso batzuei bururatu zitzaien ideiatik sortu zen danborrada 1996an, Leandro Carro presidentearen babesarekin. Hauek ziren zuzendaritzako kideak: Javier García, Txema Furundarena eta Iñigo Santín; gurasoak eta jarraitzaileak: Jesús Cuesta, Agustín Soriano, Andoni Lareki eta José Mª Oiz. Ondoren sartuko ziren Flori Bardaji eta Jesús Rueda. Entrenatzaileak eta zuzendaritzakoak danborrak izatea pentsatu zuten, eta jokalariak eta gurasoak barrilak. Behar adina jende bildu ez zenez, auzora ireki zen eta hamabost egunetan osatu zen.
Batzordearen erabakiz, danborradak bereizgarriren bat behar zuenez gero, garaiko kanoi bat fabrikatu zuten. Hala, Jesús Cuesta Morenoren ezagutzari eta trebetasunari esker moldatu eta fabrikatu zen kanoia. Leandro Carro presidenteak adierazi zuenez elkarteak hartuko zuen bere gain kanoiaren fabrikazioaren gastua, baldin eta 1997ko urtarrilerako amaitzen bazen. Eta 1997ko urtarrilaren 20an irten zen danborrada kanoiarekin. Hurrengo urtean, 1998an, fusilarien sail bat eta urketarien konpainia bat gehitu zitzaizkion danborradari.
